T.I.T. son as siglas do Taller de Investigación Teatral (e Formación Dramática). O obxectivo desta iniciativa foi establecer
un lugar de confluencia para o traballo continuo dentro do eido teatral. Non se
trata pois dun traballo puntual senón dunha entidade permanente. Dada, ademais,
a formación variada dos compoñentes, as liñas potenciais de orientación son
diversas: dende as máis propiamente filolóxicas e ligadas ó texto ata as de creación audiovisual, pasando polo
traballo plástico ou o máis puramente pragmático de teoría teatral, deseño
escénico e creación dramática. O uso da palabra taller responde a que a idea principal é a de establecer un lugar físico de traballo interdisciplinar, incluído o traballo manual preciso no deseño, elaboración de escenografía metálica ou téxtil, traballo eléctrico, etc...
O proxecto centrou o seu primeiro ano en
varios conceptos propostos por Fran Godón dentro do chamado proxecto Caixa.
En primeiro lugar procurouse un traballo cos actores e actrices para a
potenciación física e de recursos técnicos mínimos para acadaren posteriormente
os obxectivos prefixados. A continuación profundouse nunha serie de ideas que
xa xustificaran a montaxe de Memoria de Ut: o principio de dramación
como proceso dramático creativo (ou de creación dramática) e o concepto de teatro
precario ou teatro desprovisto como concepción artística derivada en certa
medida do “teatro pobre” de Grotowski (mesturándose con influencias doutros
como Artaud ou Meyerhold) pero coas súas propias características intrínsecas.
Todo condicionado pola propia realidade da teatralidade galega e o xogo que
xera o esperpento. Un filtro, este último, reinterpretado e xogado ó
que nin director nin compañía poden renunciar como característica propia da súa
concepción artística. Non se inventa
nada pero é unha escolla de pautas creativas e a súa modificación e aplicación
na busca dun modelo práctico de creación e de codificación teatral propios.
No 2011 créase Ut·Tópico
Teatro, o resultado lóxico da parte máis experimentadora do TIT (e de Teatro
no Aramio).